બા નો ફોટો..

અંતે મેં જાતથી છેડો ફાડયો,

મોબાઇલના કેમેરામાં જઈને બાનો છેલ્લો ફોટો પાડયો.

 

બાનું હોવું ઘરમાં એટલે ચારે ખુણે અજવાળું,

બા વિનાના ઘરમાં છે જાણે નિસાસાનું તાળું,

 

ખોળે અંજળ ખુટયા જાણી માનો પાલવ મેં ભીંજાવ્યો,

અંતે મેં જાતથી છેડો ફાડયો.

 

બાની આંખે રોજ ફુટતી મમતાની કૂંપળ તાજી,

બાપ વિનાના ઘરની બાએ જીતમાં ફેરવી બાજી,

 

ખુદ જળજળિયા પીધા માએ, મને છપ્પન ભોગ જમાડયો,

અંતે મેં જાતથી છેડો ફાડયો.

 

શ્રીફળ સાથે જાણે આજે રસોડું બંધાતું,

ફળિયું આખું આજે માના ચરણોમાં અટવાતું

 

મા વિનાનાં માના દેહને મે મારા ખભ્ભે ઉપાડ્યો.

અંતે મેં જાતથી છેડો ફાડયો,

 

મોબાઇલના કેમેરામાં જઈને બાનો છેલ્લો ફોટો પાડયો.