સપનાંને ઠપકો
સપનાંને ઠપકો
પામીને મુજને તું શું પામે ?
ફરી, મળવા ન આવજે બ્હાને.
જીંદગી તો એક રણ બનીને છે પડી, એમાં ઉમેરાય ઝાંઝવાના નીર...
કાંટાળી ઇચ્છા ને અભરખા અધૂરાં એમાં, ઉપરથી ઘેરાતું આટલું તિમિર.
ઉઝરડાના ઘાવથી ખરડાયેલ ચહેરાને, શણગારની જીદ કરે શાને ?
...૦ ફરી, મળવા ન આવજે બ્હાને.....
સપના, તુજને શીદ આંખો ગમે છે મારી ? કેમ તંબુ પાંપણોમાં તાણે ?
આવતા જતા તને કોણ આપે સરનામું, આવી ચડે કેમ તું કટાણે ?
સંઘરવું તુજને મારે વસમું થઇ પડે છે હવે, કેમ સમજાવું તને , જા ને ...
.....૦ ફરી, મળવા ન આવજે બ્હાને.