આ આંસુ

ગાલ પર વહેતી ખારાશ છે આ આંસુ,

શાયરનાં આયખાનો સારાંશ છે આ આંસુ.

બે દરદ વચ્ચેની શરત છે આ આંસુ,

ઓશિકાના કવરની પરત છે આ આંસુ.

શોરમાં ધીરે ધીરે ડૂસકે છે આ આંસુ,

અંતરનાં ઉજાગરે ધ્રુસ્કે છે આ આંસુ.

ગઝલની પાયાની ગરજ છે આ આંસુ,

ન કહેવાતા શબ્દોની સમજ છે આ આંસુ.

સન્નાટામાં સંભળાતા અવાજ છે આ આંસુ,

ભીડમાં ચુપકીદીનો રિવાજ છે આ આંસુ.

હૈયાની હળવાશનાં છેડા છે આ આંસુ,

પાંપણ જોડે દિલનાં ચેડા છે આ આંસુ.

કીકીઓમાં લાગણીનું વજુદ છે આ આંસુ,

પ્રતિઘાતની રાતાશમાં બારૂદ છે આ આંસુ.

ધીરજની આંગળીઍ લૂછાય છે આ આંસુ,

પ્રિયતમનાં આગમને ભુંસાય છે આ આંસુ.

મુફલિસની અદામાં અડકાય છે આ આંસુ,

મધરાતનાં ખોળામાં ખડકાય છે આ આંસુ.