ખપ લાગશે તને
ખપ લાગશે તને
1 min
7.1K
મારી સ્મૃતિ યે ક્યાંક તો ખપ લાગશે તને,
ક્યારેક ક્યાંક મારી તલપ લાગશે તને.
દુનિયાની બધી વાતો ગળે ઊતરી જશે,
જે હું કહીશ આજ એ ગપ લાગશે તને.
હમણાં અહીં તો ચારેતરફ અંધકાર છે,
હમણાં તો દોરડું યે સરપ લાગશે તને.
ચાલી રહ્યું છે શ્વાસમાં જે નામનું રટણ,
ફોગટ બધું યે મારું આ તપ લાગશે તને.
જોયા કરીશ એકીટશે મારી વાટ તું,
પાંપણ ફરકશે ત્યાં જ ભીનપ લાગશે તને.
તું રોકશે છતાં ય હું રોકાઇ નહિં શકું
ત્યારે એ મારી વ્યર્થ ઝડપ લાગશે તને.