રણઝણતું એ ઝાંઝર બોલે

લાલ રંગની ભાત ભરેલી નાનકડી પગલીમાં ઓલું લીલું લીલું પણ ડોલે

લટકાતી-મટકાતી ચાલે છમછમ કરતી ઝાંઝરિયુનું ઝીણું ઝીણું ગાન બોલે

રણઝણતું એ ઝાંઝર બોલે..

 

સોળ વરસથી કૂવા કાંઠે

ગાગરડી ભરવાને કાજે

સૈયર કેરો સંગ કરીને

પગલાં પાડે પડખે આજે

 

અલક-મલકની વાત ઊઘડે આંખલડીમાં ધીમાં ધીમાં પ્રિતમના કામણને ખોલે

રણઝણતું એ ઝાંઝર બોલે..

 

વાંસલડીના સૂર સૂણીને

કોયલ ટહુકે ડાળે બેઠી

ઘેલી રાધા ભાન ભુલીને

મોહનની પડખે જઈ બેઠી

 

ભવભવની એ પ્રીત ભરેલી હરખાતી ધીમેથી બોલે કોઈ ન આવે એની તોલે

રણઝણતું એ ઝાંઝર બોલે..