વરસી પડ્યાં વાદળ

સાવ અચાનક નભ માથેથી વરસી પડ્યાં વાદળ 

કયા શબ્દોમાં લખવો મારે વરસાદીલો કાગળ

 

રાતો સઘળી ઝળહળ લાગે પ્રણય પાંદડું ફૂટે 

અને સવારે પાન -પાનમાં પ્રગટે ઝીણી ઝાકળ

 

ફૂલ બગીચે બેસી રહીયે સાંજ વીંટાતી આવે 

પાંપણ ઢાળી કરે પ્રતિક્ષા અને વધેરે શ્રીફળ

 

દ્વાર ઉપર જ્યાં પડ્યા ટકોરા કોના છે ભણકારા 

પ્રેમલ - ઝરણું ખળખળ વહેતું એમ કરું છું અટકળ

 

તું જે આપે એ જ મજાનું જીવન જીવવા માટે 

ધરી દીધી છે હવે હરિવર તારા ચરણે હરપળ