સાથ તારો જોઇએ
સાથ તારો જોઇએ
ક્યાં કહું છું કે મને સૂરજ હજારો જોઈએ !
તું ક્ષિતીજે હો ઊભી એવી સવારો જોઈએ.
હું તૃષાતુર તપ્ત સહરા છું યુગોથી, જોઈ લે;
પ્રેમ તારો બે ઘડી નહિ, એકધારો જોઈએ.
થાક મારો જિંદગીભરનો ઉતારું ક્યાં જઈ ?
ખોલ પાંપણ, આંખમાં તારી ઉતારો જોઈએ.
હું બધીયે ધારણાઓથી થયો છું મુક્ત, તો;
બસ, હવે તારા, ફકત તારા વિચારો જોઈએ.
એકલા હાથે અહીં ગુલશન કદી ખીલતા નથી;
આ જીવન મહેકાવવાને સાથ તારો જોઈએ.