તું જ ચાંદ ને તું ચંદન છે મા,
તને સદા અંતરના વંદન છે મા.
તું મહેફિલ છે એકલતા મધ્યે
ને તું જ ભીડનું ભંજન છે મા,
અજ્ઞાનના અંધકારમાં હું અટવાયો,
આંખે મારી જ્ઞાનનું તું અંજન છે મા,
તું જ આકાશ છે મારી મુક્તિ કેરું,
તારે જ ખોળે પ્રેમનું બંધન છે મા.
છે વ્હાલપના ઝરણા અકબંધ હથેળીમાં,
ને મમતા કેરા સ્પર્શનું તું સ્પંદન છે મા.
તું જ તીર્થ છે મારું ને તું છે મારી હજ,
તું જ રામ-રહિમને તું દેવકીનંદન છે મા.