ચૂપ થઈ જવાનું
ચૂપ થઈ જવાનું
સેલ્ફીથી ધૂમ મચાવે ત્યાં ચૂપ થઈ જવાનું
પોતાના ગીત ગાવે ત્યાં ચૂપ થઈ જવાનું
નાચીને મન મનાવે ત્યાં ચૂપ થઈ જવાનું
નખને ય ના જલાવે ત્યાં ચૂપ થઈ જવાનું
શાસ્ત્રાર્થ કે પ્રમાણો લિજ્જતથી પડતા મૂકી
પંડિતજી પાન ચાવે ત્યાં ચૂપ થઈ જવાનું
વરસાદ વીજળીનો સંબંધ પૂછીએ તો
તું આંખ ઝિલમિલાવે ત્યાં ચૂપ થઈ જવાનું
એ રોજ - રોજ મળવાં આવે અચૂક કિન્તુ
બ્હાના નવાં જ લાવે ત્યાં ચૂપ થઈ જવાનું
ચંદન તળાવ પાળે રુમઝુમતી ચાંદનીમાં
જો યાદ એ ના આવે ત્યાં ચૂપ થઈ જવાનું
ખૂશ્બૂની બ્રાન્ડ બે-ત્રણ, રંગોની બે'ક વક્કલ
લઈ જાત ઝગમગાવે ત્યાં ચૂપ થઈ જવાનું
એકાદ મધનું ટીપું જો મિત્રતા સ્વીકારે
તો મોતીથી મઢાવે ત્યાં ચૂપ થઈ જવાનું
કલશોર, કેકા, ટહુકા લયમાં લસોટી પીવા
ઉપચાર એ બતાવે ત્યાં ચૂપ થઈ જવાનું