અજવાળું થઇ ગયું,
અજવાળું થઇ ગયું,
1 min
13.4K
ઘટમાં થયું પ્રભાત ને અજવાળું થઇ ગયું,
ઝબકીને જાગી જાત ને અજવાળું થઇ ગયું.
પાંચે ય તત્ત્વ જ્યારે પુષ્પ-પુષ્પ થઇ ગયા,
ત્યાં મ્હેક-મ્હેક ગાત ને અજવાળું થઇ ગયું.
એક જ અલખ ને એ જ અનલહક અવાજમાં,
ડૂબી જ્યાં કાયનાત ને અજવાળું થઇ ગયું.
કોઈ સૂરજ ન કોઇ ચંદ્ર , અસ્ત ના ઉદય,
દીવો ન કોઇ બાત ને અજવાળું થઇ ગયું.
કોણે ઉલેચ્યા અંધકાર? કોણે આ કર્યું?
અજવાળું આત્મસાત્ ને અજવાળું થઇ ગયું.