શ્રાવણી

ઝરમર ઝરમર શ્રાવણી સરવરિયાં;
યાદ આવે મને તું સાવરિયા.

વારિ વરસે દળવાદળથી,
પાણી ટપકે વૃક્ષપલ્લવથી.

ટગરટગર અનિમેષ નજરથી,
નીરખે તું મને બારસાખેથી.

છબછબ છબછબ ભાદૌ છબછબિયાં;
યાદ આવે મને તું સાવરિયા.

રૂમઝુમ રૂમઝુમ ઝરણાં દોડે,
થનગન થનગન સરિતા દોડે.

છમછમ છમછમ ઝાંઝર પહેરી,
દોડતી’તી હું તુજને મળવા.

રીમઝીમ રીમઝીમ વરસે મેહુલિયો,
યાદ આવે મને તું નાવલિયો.

ધ્રીબાંગ ધ્રીબાંગ ધીન અંબર ગાજે,
વીજ ધ્રૂજી ધરણી આભને વળગે.

ધડધડ ધડધડ ધડકન દિલમાં,
બાઝી પડતા એકમેકને ડરમાં.

ઝરમર ઝરમર શ્રાવણી સરવરિયા
યાદ આવે મને તું સાવરિયા !