પૂછો નહીં...
પૂછો નહીં...
1 min
13.7K
દર્દનો અહેસાસ કેવો થઇ ગયો પૂછો નહીં,
સુખનો આભાસ કેવો થઇ ગયો પૂછો નહીં
દિલ લગાવી દિલ્લગીમાં હૂંફ મેળવતો રહ્યો,
તીરનો અભ્યાસ કેવો થઇ ગયો પૂછો નહીં.
એક આ સંસારની ઘટમાળ નો છેડો નથી,
આ સફરમાં ત્રાસ કેવો થઇ ગયો પૂછો નહીં.
છંદ, લય ને અર્થની સાંકળ પછી તૂટી ગઇ,
આ ગઝલનો પ્રાસ કેવો થઇ ગયો પૂછો નહીં.
બહુ દિલાસો આપતા મિત્રો બધા ભેગા મળી,
એ બધો બકવાસ કેવો થઇ ગયો પૂછો નહીં.
એક સપનું આંખમાં આવ્યું અને ચોંટી ગયું,
બે ઘડી અજવાસ કેવો થઇ ગયો પૂછો નહીં !
મેં કદી ક્યાં કોઇની, ક્યારે તરફદારી કરી?
તોય ખાસમ્ ખાસ કેવો થઇ ગયો પૂછો નહીં!
અર્થનો નઇં અર્થ ખોળ્યો એ પછી સંવાદમાં,
તે પછી સહવાસ કેવો થઇ ગયો પૂછો નહીં.