આ મેઘો કનડે

હું ખાલીપો સુકવું, ને તું મુશળધારે વરસે,
ઓ રે મેઘા, ઓ રે મેઘા, મન મારું તુજને તરસે

રાતો મોઘમ ચૂકવું, ને તું આખા ગામો ગજવે,
ઓ રે મેઘા ઓ રે મેઘા, મન મારું તુજને તરસે

નિકળી જ્યારે ઘરની બા'રે ચુનર ધોળી ઓઢી,
નિર્લજ થઈને રોકે રસ્તો ભીંજવતો તું દોડી

ચુનરનું ત્યાં ઝુકવું, ને તું લે આલિંગન હરસે
ઓ રે મેઘા ઓ રે મેઘા, મન મારું તુજને તરસે

રુદિયાના કલરવ વચ્ચે બાંધ્યો મેં લીલો માળો,
કોરી સુકી માટીમાં તું ઉગાડે ગરમાળો,

શમણાં સઘળાં તારે કાજે ટીપે ટીપે ઝરસે
ઓ રે મેઘા ઓ રે મેઘા, મન મારું તુજને તરસે