આમ તો કંઇ નો'તું...
આમ તો કંઇ નો'તું...
આમ તો કંઇ નો'તું, સાંજે આભ આ રંગાયું'તું,
આમ તો કંઇ નો'તું, તારૂ વ્હાલ ત્યાં ઢોળાયું'તું.
ઠરતું ઝાકળ થૈને ફુલો પર સવારે જે ભલા,
આમ તો કંઇ નો'તું, તારું આંસુ બસ છલકાયું' તું.
એક હરણે શ્ચાસ છોડ્યો તરફડીને પ્યાસથી,
આમ તો કંઇ નો'તું, પણ તડકાએ મૃગજળ પાયું'તું.
ચાંચમાં અજવાસ લીલો પીને ભરબપ્પોરના,
આમ તો કંઇ નો'તું, પંખીથી જરા ટ્હુંકાયું'તું.
શોધતા એ શું સવારે-સાંજે આ દીવા કરી?
આમ તો કંઇ નો'તું, મંદિરમાં કશું ખોવાયું'તું...