નાના પ્રશ્નો પણ...

જીવનના નાના પ્રશ્નો પણ લાગે મોટા પર્વત છે,
પણ લડવામાં એની સામે કેવી ભારે રંગત છે.

શબ્દ ગગનમાં સંવેદનની ભીની ભીની બરકત છે,
સાચું કહું છું એ જ અમારી સાચે સાચી મિલકત છે.

તું માને કે સૌથી સારી જગમાં તારી ઇજ્જત છે,
જગને, વશ કરવાની, જ્યારે, મારી જૂની આદત છે.

લેણાંદેણી પળની છે પણ રોજ સવારે મળવાનું,
જુઓ પેલી ઝાકળની પણ સૂરજ સાથે સોબત છે.

ભળવું, લળવું, તરવું, મરવું એ તો કેવળ કર્મ બને,
પણ ક્રિયાને પાર જશો તો એ બનતી ઇબાદત છે.

આમે ક્યાં લખવું છે મારે ઇનામ અકરમ, લાલચવશ,
શબ્દ બનીને ઝળહળ કરવું સાવ ફકિરી હરકત છે.

અંધારાને પાર ઘૂઘવાતા દરિયા જે દેખાડે, એ,
નાની સરખી આંખોમાં પણ કેવી કેવી સવલત છે.