વરસાદી વાયરાની વાછંટે

ઓણુકા વરસાદી વાયરાની વાછંટે,

એવી ભીંજાણી, એવી ભીંજાણી કે -

રોમ રોમ લાગી ગઈ લા'ય

 

સૂતેલી આશાઓ વેંત વેંત ઉછળીને,

એવી તો ઝબકી, એવી તો ઝબકી કે -

કણકણમાં વાયરાઓ વા'ય

 

જાણે ભીતરમાં ઝરમર વરસાદ

 

અલપ - ઝલપ, આગળ - પાછળ

નદીયું જાણે વહેતી,

ખળખળ - ખળખળ, વહેતી - વહેતી

ધીમી વાતું કહેતી,

 

સાતેય રંગોની ઝાંય એમ ઉઘડી ને,

એવી તો ઝળકી, એવી તો ઝળકી કે -

રણઝણતી લાગી કંઈ ઝાંય

 

જાણે ભીતરમાં ઝરમર વરસાદ

 

છબક - છબક, ચટક - ચટક, ચંચલ કાયા ચાલે,

ધબક - ધબક, લટક - મટક, દલડું ધીમું હાલે,

 

શ્યામ તારી મોરલીનો નાદ મીઠો સાંભળીને,

એવી તો થરકી, એવી તો થરકી કે --

ગીતોમાં મઘમઘ થવાય

 

જાણે ભીતરમાં ઝરમર વરસાદ