આજે એક ગીત !
આજે એક ગીત !
થનગનતા વાયરાએ છેડી જરા,
ને પછી કૂંપળને ફૂટ્યું'તું ગીત !
આ તો છાની પણ સાચકલી પ્રિત!
લીલીછમ કૂંપળના કુણાકુણા દેહમા હળવી ધ્રુજારી કૈ આવી;
માણસ કૈં થોડા ? એને પાંદડાના પરિવારે હરખેથી લીધી વધાવી !
વાયરાનું છેડવું ને કૂંપળનું ગાવું એ તો ભવે-ભવે નવતર છે રીત...
આ તો છાની પણ સાચકલી પ્રીત !
ચોખ્ખાચટ આભ તળે કૂણોકૂણો તાપ પ્હેરી કૂંપળ દે' હરખાતા કંઈ!
મનડાની માહ્ય સાવ ખાલીખમ ઓરડો વરણાગી વ્હાલમને દઈ,
વ્હાલમના વ્હાલમાં છત રે રંગાણી, ને રંગાણા ભીંત ને પછીત!
આ તો છાની પણ સાચકલી પ્રીત..