શબ્દસાગર
શબ્દસાગર
મોજડી પણ પારકી અપનાવવા લાગ્યાં;
માપ-બ્હારા પગ હતાં એ ભૂલવા લાગ્યાં.
સાદું પાણી ના પચાવી જાણતા જેઓ-
આંખ સામે જોઈ સૂરા ઝૂમવા લાગ્યાં.
ક્યાં પરિચય પૂરતો છે શબ્દસાગરનો;
પગ મૂક્યો સ્હેજે કિનારે ડૂબવા લાગ્યાં.
ઊંટ અરબી જ્યાં પલાણ્યું રેતના ઢૂંવા-
ઊંચે ઊંચે ખૂબ ઊંચે ઊડવા લાગ્યાં.
માર્ગ જગજાહેર સમજી હક કરી બેઠાં-
કોઈએ રોક્યા જરી લલકારવા લાગ્યાં.
જાહ્નવી-જમના પ્રદુષિત; ને નદીઓ પણ-
શુદ્ધ વૈચારિક પ્રવાહો ડ્હોળવા લાગ્યા.
બંધ લખવાનું કરો 'ગુણવન્ત' ગાગાગા-
શ્વાસ સક્ષમ સૌ મળીને રુંધવા લાગ્યાં.