વસંત આવી
વસંત આવી
જુઓ આ કામણગારી વસંત આવી,
વસંતોત્સવની ઓઢણી ઓઢી આવી.
મા સરસ્વતીને વધાવવા આવી,
જ્ઞાન પૂંજ નું તેજ ફેલાવવા આવી.
તરૂવરોનો શણગાર બની આવી,
મઘમઘતા ફૂલોની ફોરમ લઈ આવી.
આમ્રકુંજની માદક મહેક લઈ આવી,
કોયલના કુંજનનું સંગીત લઈ આવી.
ભ્રમરના ગુંજનનું ગાયન લઈ આવી,
નિસર્ગનો છલકાતો વૈભવ લઈ આવી.
સોનાવરણી ફૂલોએ ચાદર બિછાવી,
કેસુડાએ પણ આસપાસ જાળ બિછાવી.
નવપલ્લિત નવોઢા શી ધરતી બની,
વસંતના વૈભવની યુવાની લઈ આવી,
પ્રકૃતિ ઉત્સવની ઉજવણી કરવા,
'તેજબિંદુ' શાબ્દિક રચના લઈ આવી.