એ પ્રેમ છે
એ પ્રેમ છે
1 min
7.2K
પુષ્પ, સ્પર્શે રક્તવર્ણુ થાય તો એ પ્રેમ છે
ઝાકળે કોમળ કળી ભીંજાય તો એ પ્રેમ છે
ટેરવે જો સળવળે શબ્દો અચાનક એમનાં,
ને ગઝલ આખી અહી સર્જાય તો એ પ્રેમ છે
ચિત્રમાં એણે પતંગિયુ ચિતર્યું રંગીન તો,
ગાલ મારાં રંગથી છલકાય તો એ પ્રેમ છે
ફેરવું હું આંગળી ઠંડી હવામાં ભુલથી,
ત્યાં ગગનમાં નામ એ ચિતરાય તો એ પ્રેમ છે
કેસુડો ખીલે વસંતે કેસરી રંગો સજી
પાનખરમાં હુંફ એ વર્તાય તો એ પ્રેમ છે
સ્પર્શના ટહુકા હથેળીમાં થતાં જો ફાગણી
આમ્રકુંજે મંજરી મ્હોરાય તો એ પ્રેમ છે
એક પડઘો થાય, ખાલીપો સુનો રણકાય ત્યાં,
ડાળ લીલી કુંજ થઇ લ્હેરાય તો એ પ્રેમ છે