આ કાળું પાટિયું ને ચોક
આ કાળું પાટિયું ને ચોક
આ કાળું પાટિયું ને ચોક, લ્યો જનાબ, લખો,
તમારા હાથ વત્તા કેટલાં ગુલાબ ? લખો.
ખરું ને ? શોખ છે તમને પ્રથમથી ફૂલોનો,
તો કેમ બાગમાંથી લાવ્યા ખાલી છાબ ? લખો.
ફરી પૂછું છું કે શું અર્થ છે આ જીવતરનો,
લ્યો, ચોક લ્યો, અને આ પ્રશ્નનો જવાબ લખો.
ખરાબ સ્વપ્નથી નંબર વધે છે ચશ્માંના,
તો કેવા સ્વપ્નને કહેશો તમે ખરાબ ? - લખો.
લખો, લખો કે છે, તમને તો ટેવ લખવાની,
બધા તમારા આપઘાતના હિસાબ લખો.
આ કાળા પાટિયાનો બીક કેમ રાખો છો ?
તમે સમર્થ છો, લ્યો ચોક, ‘આફતાબ’ લખો.