ચાલને
ચાલને
ચાલને કાંઈક કરીએ મધુરું મધુરું,
ભલેને પછી રહે તે અધૂરું અધૂરું,!
ચાલને ... !
તારી ટચલીને મારી ટચલીમાં જરા ભરાવીને ફરીએ,
એકબીજાની આંખોના ઇશારે પહેલાં જેવું રમીએ.
ચાલને ... !
લાગણીઓ અને ઈચ્છાઓને ક્યાં લગી સંઘરીએ ?
ઘણું દબાવી રાખ્યું મન, હવે તો જરા નીકળીએ !
ચાલને ... !
ઠસ્સો તો એ જ રાખીએ ભલે માથે ક્યાંક ચમકે ધોળા,
કાંસકો મૂકીએ પડતો ને વાળ આંગળીયો થી ઓળીએ.
ચાલને ... !
આમ તો ઘણું દોડ્યાં છીએ ને હવે થાક્યાં એવું લાગે,
જવાબદારી ની ઝંઝાળ મૂકી હવે બાંકડે બેસી પડીએ.
ચાલને ... !
રોકાણો ને નફાઓ ના હિસાબો તો ઘણા ટપકાવ્યા છે,
તું મુજમાં ને હું તુજમાં રોકી હવે એકબીજામાં ભળીએ.
ચાલને ... !
સાસુ સસરા ને પછી દાદા નાની કંઈ કેટલુંય હજુ આવશે,
ફરી એકબીજાને ગમીએ ને જરા બાળક બની ને ભમીએ.
ચાલને ... !
જાણે હમણાં તે પાનેતર ઓઢ્યું, મેં સહેરો સજાવ્યોતો,
વળી શીદને વર્ષો ગણીએ, ફરી નવપરણિત બની ફરીએ !
ચાલને ... !
ચાલને કાંઈક કરીએ મધુરું મધુરું,
ભલેને પછી રહે તે અધૂરું અધૂરું !
ચાલને !