મન તને થયું છે શું?
મન તને થયું છે શું?
પંખાના ખડખડમાં આ નદીનું ખળખળ કેમ સંભળાય છે?
મન તને આ થયું છે શું?
ટ્યુબલાઈટનાં અજવાળામાં આગિયાનું તેજ કેમ દેખાય છે?
મન તને આ થયું છે શું?
રસોડામાંથી કચકચ કરતી પત્ની પર ગુસ્સાની બદલે આટલો બધો પ્રેમ કેમ ઉભરાય છે?
મન તને આ થયું છે શું?
એ બધા સાથેનાં વર્ષો જૂનાં અબોલા તોડવા ઉતાવળ કેમ છે?
મન તને આ થયું છે શું?
સામે કોઈ મળે તો એને જાદુની ઝપ્પી દેવાની બેતાબી કેમ છે?
મન તને આ થયું છે શું?
આ ઘડીએ કોઈ કાંઈ માગે તો બધું આપી દેવાનો ઉમળકો કેમ આવે છે?
મન તને આ થયું છે શું?
જો મન, આવું તેવું થાય એ બરાબર નથી.
તબિયત તો સારી છે ને?
બીપી માપ્યું? એ તો વધી ગયું નથી ને?
સવારે બીપી અને લોહી પાતળું કરવાની દવા ખાવાનું ભૂલાઈ તો નથી ગયું ને?
આ ઉંમરે આ સારી નિશાની નથી. હૃદય હવે આવા આઘાત ખમી
શકે એવું મજબૂત રહ્યું નથી.
બીપીની ટેબ્લેટ લઇ લે, થોડીવાર આડે પડખે થઈ જા,
સૌ સારા વાના થઇ જશે.