ચોમાસુ બેઠું
ચોમાસુ બેઠું
1 min
6.9K
આ વાદળ ઉમટ્યા, આખેઆખું આભ ભરાયું,
વાયરો ઠંડોગાર વાયો, ચોમાસુ બેઠુ.
કયાંક વિજળી ચમકી, કાળુ ડિબાંગ આ નભ આખુંયે,
અંધાર ચારેકોર છાયો, ચોમાસું બેઠુ.
આ વિજળીનો ચમકાર થતોને છાંટા ચમકદાર બનીને ઝળહળ વરસે.
આ ખેતરના શેઢે અડિખમ લીલુડો લીમડો ઉભોને વાદળ વરસે.
આ તડકા ગાયબ, સૂરજ ગુમ થયો સમૂળગો, મોરલાએ કોઈ રાગ ગાયો, ચોમાસુ બેઠું.
આ સડકની પડખેની નીકમાં ખળખળ થાતું પાણી નદીએ ચાલીયું જાતું.
આ વડલાની એકડાળે બેઠું ભીનુ પંખી મનમાં-મનમાં રાજી થાતું.
આ ડુંગર ઉપર, ખેતર, રસ્તે, વનવગડામાં લીલો રંગ બધે પથરાયો,
ચોમાસુ બેઠું.
આ વાદળ ઉમટ્યા, આખેઆખું આભ ભરાયું, વાયરો ઠંડોગાર વાયો,
ચોમાસુ બેઠું..