માત્ર ઈશારો

નહીં વિગતથી કરે વૈખરી કરશે માત્ર ઈશારો
વ્યાકુળ જેનું ચિત્ત ઝીલવા
એને એકે વાતે નહીં મૂંઝારો

પરખ પવનની વન અચરજનુ
પાણીના રંગોની સમજણ ઝીરો
કરચ કાચની કેવળ ભાસે
મહામૂલો જે હોય સ્વયંમાં હીરો
ધરમૂળથી ધારણ બદલી
કરે તોલ ને મોલ એજ મણિયારો
નહીં વિગતથી કરે વૈખરી કરશે માત્ર ઈશારો

કૌટિકમાંથી કરી પસંદગી
હોંકારો જે આપે એને વરે
સરવાં ભાળે શ્રવણ-ગ્રહણને
ત્યાં ધીમેથી જરા અમસ્તું ઝરે
રમે સાનમાં સબૂર સંપદા
ઝમે કદી તો થઈ રહેતી ઝણકારો
નહીં વિગતથી કરે વૈખરી કરશે માત્ર ઈશારો