મન વગરનું મળવું વાલમ

મન વગરનું મળવું વાલમ, મન વગર શું મળવું

વાત વાતમાં ઝગડી પડીએ નાહક નાહક રડવું

 

ઉપેક્ષાના તીર હવે તો વીંધે છે હૈયાને

રાત આખીયે ડંખ્યા કરતી વાત બધી શૈયાને

મોંસૂઝણાની વેળાએ પણ જીવતર લાગે કડવું

મન વગરનું મળવું વાલમ, મન વગર શું મળવું?

 

વૈભવને દરિયે બેસીને રેતીમાં નિત ફરતાં

શંખ કોડી ને છીપલાં માટે આપસમાં રે લડતાં

દરિયામાં જન્મારો વીત્યો, તોય શીખ્યા નાં તરવું

મન વગરનું મળવું વાલમ, મન વગર શું મળવું