વાસંતી યાદોનું વાસંતી ગીત

તારી મારી યાદની મૌસમ આવી છે અલબેલી,

ફુલ - કળીયો ડાળી આખી થઈ ગઈ ઘેલી ઘેલી. 

વનવનમાં ભમરાઓ ડોલે,

મધમીઠાં સપનાઓ ખોલે. 

સાજ સજીને પ્રીત પિયુનાં અંતરને અડકેલી 

ફુલ - કળીયો ડાળી...

વસંત ઘેલો ડોલે વાયુ, 

કેસુડાયે કૈંક તો પાયુ. 

અંગ અધૂરા રંગાવાની લાગી તાલાવેલી, 

ફુલ - કળીયો ડાળી...

મનમાં ઝીણું ઝીણું નાચે 

મોર  ટહુકો  પીયુ વાંચે 

મોરપીછનાં સંગે રાધા હૈયામાં હરખેલી, 

ફુલ - કળીયો ડાળી...