જોતી રહી

દૂરનો સુંદર નજારો આંખડી જોતી રહી,
બાગની મ્હેકી બહારો આંખડી જોતી રહી.

ફુલતા ફલતા વિચારો આંખડી જોતી રહી,
રંગ ધરતો હર નજારો આંખડી જોતી રહી.

ફુલની ફોરમ બધાના શ્વાસમાં ફરતી રહી,
મૌજમાં ડૂબી કતારો આંખડી જોતી રહી.

ભાવનામાં ડૂબનારા વળગણોની કૈદમાં,
કૈદ ભોગી ભાઈચારો આંખડી જોતી રહી.

પ્રેમ ઘેલા રાજવીની છે નિશાની આખરી,
યાદના ઢળતા મજારો આંખડી જોતી રહી.

કેટલા માસૂમ પરાણે દોરવાતા આપણે,
આંખડી કરતી ઇશારો આંખડી જોતી રહી.