અશ્રુની ભાષા

અશ્રુની ભાષા કદી વંચાય શું?

સુખનું કે દુ:ખનું કદી પરખાય શું?

 

આંખમાં ઢાંક્યું કશું ઢંકાય ના

લાગણી રોકી કદી રોકાય શું?

 

હોય કે ના હોય એ; પણ હો તડપ

આ હ્રદયને પ્રેમનો પર્યાય શું!

 

આભમાં ઊંચે ભલેને એ ઊડે

એક રજથી સૂર્ય લગ પ્હોંચાય શું?

 

સ્વપ્ન તૂટ્યાનો કદી ના શોર થ્યો

દિલ તૂટે તો ચીસ પણ નંખાય શું!

 

સુખ વધે છે વ્હેંચવાથી સાચુ છે

દુ:ખ બજારે કોઈ દી વેચાય શું?

 

હોય મુંઝારો છતાં જીવે બધા

જીવવાનુ એટલે છોડાય શું?