'દલડું ભીનું ભીનું મલકે'
'દલડું ભીનું ભીનું મલકે'
ધકધક થાતું દલડું આજે ભીનું ભીનું મલકે,
ભીનેરી વાદળીયું વરસે જાણે એક જ પલકે,
દલડું ભીનું ભીનું મલકે.....!
અષાઢનાં આંબલીયે દીધો મોરલીયે ટહુકારો,
શ્રાવણની ઝરમરમાં ધબકે કોનો આ ધબકારો,
ધબકારે ધબકારે કોઈ છાનું છાનું છલકે ....! .
દલડું ભીનું ભીનું મલકે....!
મધરાતે આવેને તોયે બે કાંઠામાં વરસે,
મોંઘાંમુલું અમૃત પીવા ધરતી એને તરસે,
ડાળે બેઠા મેના - પોપટ મીઠું મીઠું મરકે ....!
દલડું ભીનું ભીનું મલકે....!
રસબસતી ધારોમાં આજે કાંટો મુજને વાગ્યો,
એ કાંટાથી જોબનિયામાં રંગ કસુંબલ જાગ્યો,
મણિગરને મળવા માટે મનડું આજે ધબકે ....!
દલડું ભીનું ભીનું મલકે....!