ભાવ ઓછા છે

તલબગારી જતાવે છે પરંતુ ભાવ ઓછા છે,

સમજદારી બતાવે છે પરંતુ ભાવ ઓછા છે.

અમે આદર વધું દીધાં છતાં એ ચાહની ખાતર,

ઇરાદાઓ જગાવે છે પરંતુ ભાવ ઓછા છે.

નભાવ્યા મન તણાં સ્નેહો વફાની આરજુ રાખી,

લગાવો પણ જણાવે છે પરંતુ ભાવ ઓછા છે. 

ધરી જાણી સમય સાથે હ્રદયની લાગણી કિંતૂ, 

પ્રણય ભાવો ધરાવે છે પરંતુ ભાવ ઓછા છે. 

નવા દાવે નવા રુત્બા નવા જજ્બા જગાવી ને,

નવા તોરણ સજાવે છે પરંતુ ભાવ ઓછા છે. 

ચલો શારું થયું માસૂમ તમે સમજી ગયા બાબત, 

સનમ નજરો મળાવે છે પરંતુ ભાવ ઓછા છે.