સોંપો છો;
સોંપો છો;
તમે બોલો નહીં ને બોલવાનું કામ સોંપો છો;
તમે વાચાવિહોણાંને શું આમેઆમ સોંપો છો?
અમે સુરદાસ છીએ એટલું જાણ્યાં પછી યે આપ;
નસીબે માત્ર ક્યાં બધીરોનું આખું ગામ સોંપો છો?
તમે પણ ઠીક છો; નવરાશને હળવેથી લઈ લો છો;
તરસ છીપાવવા અમને જ કાણું ઠામ સોંપો છો!
તમારું નખ સમું પણ કામ સંભાળી નથી શકતાં;
અયોધ્યા; કાશી ને મથુરાના મોંઘાં ધામ સોંપો છો!
અમારા પગ ઉપર તલભાર અમને ક્યાં ભરોંસો છે?
નજીવાં કામના બદલામાં મોટું નામ સોંપો છો!
સમજ અમને નથી કે આબરું સાચે જ સચવાશે;
નઠારા જીવને આખો છલોછલ જામ સોંપો છો?
મજાનું નામ છે ગુણવન્ત સાચવવા કરું કોશિશ;
અકિંચનને ગજાની બહારનું હે રામ; સોંપો છો.