રાણી આવે
રાણી આવે
1 min
13.9K
ચાંપ દબાવો, પાણી આવે,
ત્યારે ઘરમાં રાણી આવે !
એ રીતે એ આવી ઊભા,
જેમ જૂની ઉઘરાણી આવે !
લાખ હલેસાં સોનાનાં દે,
હોડી અંતે કાણી આવે !
અમને જોઈ લોકો બોલે :
ગઝલોનો બંધાણી આવે !
વાણી જેવું આવે વર્તન,
વર્તન જેવી વાણી આવે.
સૂરજ થોડો શેકી લઉં તો-
ઘરમાં થોડી ધાણી આવે.
દિલની ડંકી સીંચો ત્યારે,
આંખોમાં સરવાણી આવે !
ઈચ્છાનું તો એવું છે કે,
બળદે-બળદે ધાણી આવે !
'નિનાદ' એમ આવે છે ગઝલો,
દોડીને જેમ ભાણી આવે !