ચાલવા માંડે .

તમે જોતા ઉભા હો, ને નજારા ચાલવા માંડે .
પછી જોવા ને જાણ્યાના ઉમળકા ચાલવા માંડે .

મને મારી નજીક બેસાડવાનો ફાયદો છે એક ,
ઉઠીને એકદમ મારા ઉધામા ચાલવા માંડે .

પ્રથમ પરમાર્થ ના પુષ્પોને પાથરજો, પછી જોજો , 
તમે ચાલો ને સંગાથે બગીચા ચાલવા માંડે .

અમારું ઘર અમારી આદતોનુ માન રાખે છે ,
તમે આવો ને ભીંતેથી અરીસા ચાલવા માંડે .

બને તો આવજે ઈશ્ર્વર, અહીં એવું થતાં પહેલાં ,
વચનના નામથી સૌ ના ભરોસા ચાલવા માંડે .