જીવન સફર
જીવન સફર
નાની-નાની મૂઠીવાળી,
નાના-નાના પગ હલાવી,
એક શિશુએ જન્મ લીધો.
અધ્ધર-પધ્ધર ડગુમગુ ચાલે,
પડે આખડે ને વળી ચાલે,
કિલકિલાટ આખાયે ઘરમાં !
એક પગથિયું ઉપર ચડે ને
હલ્લાગુલ્લા કરે સ્કુલમાં.
નાચા-નાચને કૂદાકૂદ,
ધીંગામસ્તી અલ્લડ હાસ્ય !
થોડા પગથિયા હજુ ચડેને
ઠઠ્ઠા મશ્કરી જુવાનીનાં,
હાસ્ય સાથે ભળે ઈશારા,
પ્રેમ પાંગરેને મૂકે પગ પ્રભુતામાં !
થોડો હજુ ઉપર ચડેને
જીવનચક્કીમાં એ પીસાય.
રોજરોજની ઘટમાળમાં,
કચ્ચા બચ્ચા પરિવાર થતાં,
કાળચક્રનાં ડરમાં થાકે.
જીવનસફરનાં અંતિમ પગથિયે,
જ્ઞાન થાય અભિજ્ઞાન થાય કે,
ઈશ્વર નામની લાકડી વગર
સફળતાનાં શિખરે કેમ પહોંચાશે !
હવે તો લગીરે ચલાશે નહિ,
આગળ રસ્તો જડશે નહિ !
પ્રભુ તુંજ પરમ તેજે લઈ જા.