ક્યાં છે હવે

ગાલગાગા, ગાલગાગા, ગાલગાગા,ગાલગા,

સ્નેહના દીવાને તારી યાદ પણ ક્યાં છે હવે,

એ રીતે આ દિલને કૈ ફરિયાદ પણ ક્યાં છે હવે.

સાંજની સંધ્યા રસીલીને અધૂરા રસભરી,

કલ્પનોના બ્હાવરા સંવાદ પણ ક્યાં છે હવે.

પ્રેમનું કાજળ લગાવી આંખમાં આજે જરા,

મૌનથી ઘૂંટેલ એ વિખવાદ પણ ક્યાં છે હવે.

પ્રીતની મેઘાવી હેલીની રસમ હું જોઉં છું,

ભીંજવે એવા ગુલાબી સાદ પણ ક્યાં છે હવે.

હું ગહનતાની ગઝલમાં ડૂબકી મારું છતાં,

માણવાના રાગરંગી નાદ પણ ક્યાં છે હવે!