મ્હેરબાની અરે બધાની છે

મ્હેરબાની અરે બધાની છે,

લ્હેર બળતા મહીં હવાની છે,

હું કશું સાચવીને શું રાખું?

જિંદગી નષ્ટ જ્યાં થવાની છે,

ચાંદ ટાંકું હું તારા પાલવમાં,

એ બધી વાત બોલવાની છે,

કેવો મનમાં ભર્યો છે કોલાહલ,

જાણે આ કોઇ રાજધાની છે,

ઓ નમાઝી તમે ગઝલ વાંચો,

વાત આમાય પણ ખુદાની છે,

એટલે સાચવી છે મેં એને;

આ ઉદાસી તો કયાં જવાની છે,

પાથરું જાત એના સ્વાગતમાં,

ફૂલ જેવી ગઝલની પાની છે,

નાવ કેવી રીતે ડુબે એની?

કે ખુદા જેમનો સુકાની છે,

છેલ્લા શ્વાસે મને હજી 'મહેબુબ',

ઝંખના તારા આવવાની છે.