અરમાનોની ઉધારી
અરમાનોની ઉધારી
ઘડી બે ઘડીની પાછી નવરાશ મળી આજે,
જિંદગીને ફરી માળવાની એક આકાંક્ષા મળી,
જ્યાંથી શરૂઆત થઈ હતી સોનેરી સપનાંની,
એ જ બાળપણને ફરી જીવવાની આશા થઈ !
ખિલખિલાટને નિર્દોષતાનાં ભરપૂર વિસામે,
ડગલેને પગલે એ સુંવાળી જાજમ એક મળતી,
એ સપનાંઓને બાળપણની મીઠી રખેવાળી,
બાળપણ ગયુંને યુવાન બનવાની તાલાવેલી થઈ !
હજારો આશાઓને મુઠ્ઠીમાં કેદ કરી છે હૈયે,
ઝગારા મારતાં એ તેજે જીવનનૈયાને હંકારતી,
કાંટાળી કેડીઓનાં પથની ફિતરત છે અનેરી,
બસ આ ચાંદને ચૂમવાની હવે ધૂન સવાર થઈ !
વિસારે પડવાં લાગ્યું દિલ ઉછીનાં શ્વાસોને કેડે,
હૈયે હામ ધરીને સ્પંદનોને હું સદાય ઝીલતી,
જોતજોતાંમાં યુવાની સ્ફુરણા અર્પે હુંફાળી,
ખબર ન પડીને વનમાં પ્રવેશ્યાંની અનૂભૂતિ થઈ !
કેટલાંય અરમાનોની ઉધારીને રાખી મેં સાથે,
સંધ્યા ઢળવાની એ ભાત હોય કામણગારી,
હૈયાને હજું યુવાન રહેવાની આદત પુરાણી,
મોતને મહોત્સવ જેમ સજવાની અભ્યર્થના થઈ !