ପିତୃ ଦେବତା ଅର୍ଯ୍ୟମା

ଆମ ହିନ୍ଦୁ ବିଶ୍ଵାସରେ ଭାଦ୍ରବ ପୁର୍ଣିମା ଠାରୁ ଆଶ୍ୱିନ ଅମାବାସ୍ୟା ଏକ ପକ୍ଷକୁ ପିତୃପକ୍ଷ ବୋଲି ମାନ୍ୟ କରାଯାଏ l ଏହି ସମୟରେ ଶୁଦ୍ଧପୂତ ଭାବେ ପିତୃ ଗଣଙ୍କ ଉଦ୍ଧେଶ୍ୟରେ ତର୍ପଣ, ଶ୍ରାଦ୍ଧ, ପିଣ୍ଡଦାନ ପ୍ରଭୃତି କର୍ମମାନ କରାଯାଇ ଥାଏ l ବିଶ୍ୱାସ ରହିଛି ଏହାଦ୍ବାରା ପିତୃ ପୁରୁଷଙ୍କ ଆଶୀର୍ବାଦ ପ୍ରାପ୍ତି ହୋଇ ମଣିଷ ଜୀବନ ସୁଖମୟ ହୋଇଥାଏ l ଏଣୁ କଥା ରହିଛି, ପିତା ମାତା ସୁକୃତରୁ ପୁତ୍ର ହୁଏ ସୁଖୀ l

ପିତୃପକ୍ଷର ପିତୃ ପୂଜନ ଅବସରରେ ସାଧାରଣତଃ ମାତୃକୁଳର ତିନି ପିଢ଼ି, ପିତୃ କୁଳର ତିନି ପିଢ଼ିଙ୍କ ଉଦ୍ଦେଶ୍ୟରେ ଶ୍ରାଦ୍ଧ ତର୍ପଣାଦି କରା ଯାଏ ଓ ତାହା ସହ ପିତୃ ଗଣଙ୍କ ଦେବତା ଅର୍ଯ୍ୟମା ଦେବତାଙ୍କୁ ପୁଜନ କରା ଯାଇଥାଏ l ଭଗବାନ୍ ଶ୍ରୀମଦ୍ଭଗବତ ଗୀତା ବିଭୂତି ଯୋଗରେ ଅର୍ଜୁନଙ୍କୁ କହିଛନ୍ତି:-

          ପିତୄଣାମର୍ଯ୍ୟମା ଚାସ୍ମି 

        ଯମଃ ସଂଯମତାମହମ୍ l

ଅର୍ଥାତ୍, "ଅର୍ଯ୍ୟମା ମୁହିଁ ପିତୃ ଖ୍ୟାତ l ପିତର ପିତୃ ଲୋକେ ଗତ ll ନ୍ୟାୟ ଦଣ୍ଡୀଙ୍କ ମଧ୍ୟେ ଜାଣ l ଯମ ମୁଁ ଧରମ ରାଜନ "l 

ହିନ୍ଦୁ ଧର୍ମରେ ଅର୍ଯ୍ୟମା ଦେବଙ୍କର ବହୁ ବିଶେଷତା ରହିଛି l ଅର୍ଯ୍ୟମା ଦେବ ୠଷି କଶ୍ୟପ ଓ ଅଦିତିଙ୍କ ଦ୍ଵାଦଶ ପୁତ୍ରଙ୍କ ମଧ୍ୟରୁ ଜଣେ l ଆକାଶରେ ଆକାଶ ଗଙ୍ଗା ବା ଛାୟାପଥ ତାଙ୍କରି ପଥକୁ ସୂଚାଇ ଥାଏ l ପ୍ରାତଃ ଓ ରାତ୍ର ଚକ୍ରରେ ଅର୍ଯ୍ୟମାଦେବଙ୍କ ଅଧିକାର ରହିଛି ବୋଲି ବିଶ୍ୱାସ କରାଯାଏ l ଅର୍ଯ୍ୟମା ଦେବ ଚନ୍ଦ୍ର ମଣ୍ଡଳରେ ସ୍ଥିତ ପିତୃ ଲୋକର ଅଧିପତି l ଶାସ୍ତ୍ରରେ ଅର୍ଯ୍ୟମା ଦେବଙ୍କ ବହୁ ବର୍ଣ୍ଣନା ମିଳି ଥାଏ l ଶ୍ରାଦ୍ଧ କର୍ମରେ ଅର୍ଯ୍ୟମାଙ୍କ ବନ୍ଦନା କରାଯାଇ ମନ୍ତ୍ର ଉଚ୍ଚାରଣ କରାଯାଇ ଥାଏ :-

" ଓଁ ଅର୍ଯ୍ୟମା ନ ତୃପ୍ତ୍ୟାମିଦଂ ତିଲୋଦକଂ ତସ୍ମୈ ସ୍ଵଧା ନମଃ l" 

Advertisement