ଯନ୍ତ୍ରଣା

ମାନ ଅଭିମାନ ରାଗ ଆଉ ଘୃଣା 

ସମୟ ସ୍ରୋତରେ ବହି

ସବୁଅଟେ ମିଛ ପ୍ରେମ ଏକା ସତ

ହୃଦୟକୁ ଦିଏ କହି ||

ପ୍ରେମକୁ ତୁମର ପ୍ରତାରଣା ଭାବି

ଛାଡି ଚାଲିଗଲା ପରେ

ନିଜକୁ ନିଜେ ମୁଁ ତୁମଠି ପାଇଛି

ପ୍ରତି ମୁହୂର୍ତ୍ତରେ ଝୁରେ ||

ଅନ୍ତର ଆତ୍ମା ମୋ ପ୍ରତିଧ୍ୱନି ସାଜି

କହୁଥାଏ ମୋତେ ନୀତି

ବେଳାଭୂମି କିବା ଭୁଲାଇ ପାରିବ

ଲହରୀ ମାଳାର ପ୍ରୀତି ||

ଜାଣେନା କେମିତି କେବେଯେ କେଉଁଠି

ତୁମକୁ ପାଇବି ଖୋଜି

ଆତ୍ମଗ୍ଲାନି ଆଉ ଯନ୍ତ୍ରଣାରେ ଜଳେ

ପତଙ୍ଗଟିଏ ମୁଁ ସାଜି ||

---------

ଦିପ୍ତିରଞ୍ଜନ ବେହେରା

(ବେଣ୍ଟପଦା, ଆଠଗଡ, କଟକ, Email: [e-mail])