ଯୌତୁକ ତାଲିକା
ଯୌତୁକ ତାଲିକା
ଘରଣୀ କହନ୍ତି ଯଊତୁକେ କାଳେ
ଆଣିଛନ୍ତି ହାତୀଛତି,
ଝଗଡ଼ା ଲାଗିଲେ ଅତି ସରାଗରେ
ବଖାଣନ୍ତି ଗୋଟେ ଗୋଟି ।
କାଠ ପଲଙ୍କର ନବେ ପ୍ରତିଶତ
ତାଙ୍କ ଅକ୍ତିଆରେ ଥାଏ,
ମୁହିଁ ବିଚରା ଯେ ଦଶ ପ୍ରତିଶତେ
ଛଟପଟ ଖାଲି ହୁଏ ।
କାନ୍ଥ ଲଗା ଟିଭି ଦେଖିବାକୁ ମୋର
ସମୟ ଅଛି ବା କାହିଁ?
ଘରଣୀ ଆମର ଗୋଟେ ବି ସିରେଲ୍
ଜମାରୁ ଛାଡନ୍ତି ନାହିଁ ।
ଆଲମିରା କଥା ନ କହିବା ଭଲ
ଶାଢ଼ୀ ଦୋକାନ ଟେ ସେଇ,
ଖୁସି ମୁଁ ହୁଅନ୍ତି ଫାଙ୍କା ଥିଲେ ଜାଗା
ଚଡି ଟେ ରଖିବା ପାଇଁ ।
ଫିରିଜ୍ ତାଙ୍କର ଅତି ଆପଣାର
ସାଇତି ରଖନ୍ତି ବାସି,
ତିନିଦିନ ତଳ ଚିକେନ ଝୋଳକୁ
ପରଷି ଦିଅନ୍ତି ହସି ।
କୁଲର ପବନ ଖାଇ ଖାଇ ମୋର
ଫୁଲି ଗଲାଣି ଯେ ଦିହ,
ଡ୍ରେସିଂ ଟେବୁଲ୍ ଆଇନା ଦେଖିଲେ
ଶୁଖିଯାଏ ମୋର ମୁହଁ ।
ଭାରି ଗରବରେ କହନ୍ତି ଘରଣୀ
ଗାଡି ଆଣିଛନ୍ତି ବୋଲି,
ବୁଲେଇ ବୁଲେଇ ଥକି ମୁଁ ଗଲିଣି
ପକେଟ୍ ହେଲାଣି ଖାଲି ।
ପାଞ୍ଚ ତୁଳା ସୁନା ବେକରେ ଝୁଲୁଛି
ପୁଣି ତାଙ୍କୁ ଦରକାର,
ଖୁସି ମନେ ଥିଲେ ସରାଗେ କହନ୍ତି
କିଣିଦିଅ ରାଣୀ ହାର ।
ଛାଡ ଛାଡ ଭାଇ କି ଆଉ କହିବି
ଏ ନୁହେଁ କାହାଣୀ ମୋର,
ସମଦଶା ସାରା ଭାରତ ଭୂଇଁରେ
ପ୍ରତି ବିବାହିତଙ୍କର ।।