ଯାଉଛ ଯଦି ମକର

ଯାଉଅଛ ଯଦି ମକର ହେ ତୁମେ

ଯାଅ ପଛେ ମନା ନାହିଁ,

ଆସନ୍ତା ଥରକୁ ଆସିବ ନିଶ୍ଚୟ 

ଆମରି ମରତଭୂଇଁ l

ତୁମେ ଆସଯେବେ ମକର ଚାଉଳ

ଘରେ ଘରେ ପୂଜା ହୁଏ,

ନଡ଼ିଆ କଦଳୀ ଛେନା ଗୁଡ଼ ପଡି

ମହମହ ବାସି ଯାଏ l

ଆକାଶରେ ଉଡି କେତେ ରଙ୍ଗ ଗୁଡ଼ି

ବାଦଲ କୁ ଛୁଏଁ ଯାଇ,

ମନରେ ଆମର ଡେଣା ଲାଗିଯାଏ

ଆନନ୍ଦେ ଅଧୀର ହୋଇ l

ପ୍ରିୟ ସାଙ୍ଗ ହାତେ ଭୋଗ ଦେଇ ଟିକେ 

ମକର ଆମେଯେ ବସୁ,.

ମକର ଖେଚଡି ଘରେ ଘରେ ଖାଇ

ଖେଳ କଉତୁକେ ହସୁ l

ମକର ପରବ ମାନନ୍ତି ଆମର

ଆଦିବାସୀ ଜନ ମାନେ,

ମାଦଲ ବଜାଇ ଭୋଜି ଭାତଖାଇ

ନାଚିଥାନ୍ତି ଖୁସି ମନେ l

ବରୁଣ ଙ୍କ ଘରୁ ମକର ଆସିଲେ 

ଲକ୍ଷ୍ମୀ ମା 'ଆସନ୍ତି ଫେରି,

ଫଳ ଆଦି ସହ ପାନ ଆଣିଥାନ୍ତି

ଚୌଷଠି ମସଲା ଭରି l

ଜଗନ୍ନାଥ ପ୍ରଭୁ ଖୁସି ମନେ ଥାନ୍ତି 

ଚଉରାଶି ବେଶ ହୋଇ,

ନାଲି ଅଧରରୁ ଟହ ଟହ ହସ

ସତେ ଝରି ପଡୁଥାଇ l

ମକର ଆସିଲେ ଦିନ ବକ୍ର ହୁଏ

ସୂର୍ଯ୍ୟଙ୍କ ଉତ୍ତରାୟଣ,

ରାତି ଛୋଟ ହୋଇ ଧୀରେ ଧୀରେ ପୁଣି

ବଡ଼ ହୋଇଥାଏ ଦିନ l

ଝରା ପତରକୁ ଝରାଇ ପାଦପ 

କଅଁଳ ପତର ନାଏ,

ଆମ୍ବ୍ର ବୃକ୍ଷରେ କୋଇଲି ବି ବସି

ଗୀତ କେତେ ଗାଉଥାଏ l

ଆର ବରଷକୁ ଆସିବ ମକର

ରହିବୁ ତୁମକୁ ଚାହିଁ,

ଜଗତ ବାସୀଙ୍କୁ ଖୁସି ଆଣିଦେବ

ଦୁଃଖ କୁ ଦେଵ ଦୂରାଇ ll