ସତ୍ୟ
ସତ୍ୟ
ସତ୍ୟ ହିଁ ଚିରକାଳ ହୁଏ ପରୀକ୍ଷିତ ସମୟର କଷଟିରେ
ସତ୍ଯ ହିଁ ଦେଉଥାଏ ଆପଣା ଶୁଦ୍ଧତାର ପରୀକ୍ଷା ଅଗ୍ନିରେ ।
ସତ୍ଯ ଚିରକାଳ ଅକାଟ୍ଯ ହୋଇପାରେ କ୍ଷଣିକ ବିଚଳିତ
ସତ୍ଯ ଅପଳାପ କୁତ୍ସା ପାଶେ କେବେ ବି ନହୁଏ ପରାଜିତ।
ସତ୍ଯ ବିବାଦର କରେ ସୂତ୍ରପାତ ମାତ୍ର ଅଟେ ଚିରନ୍ତନ
ସତ୍ଯ ହିଁ ସଦା ସର୍ବଦା ଅପ୍ରିୟ ତିକ୍ତ କଟୁ ନୁହଁଇ ରୁଚିପୂର୍ଣ୍ଣ ।
ସତ୍ଯ ସହଜରେ ହୁଏ ନାହିଁ ଅନେକଙ୍କ ଉଦରରେ ଜୀର୍ଣ୍ଣ
ସତ୍ଯବାଦୀର ହୋଇଥାଏ ଅସହିଷ୍ଣୁତାରେ ଶିରଚ୍ଛେଦନ।
ସତ୍ଯ ପାଇଁ ଶ୍ରୀରାମ ଚନ୍ଦ୍ର କରିଥିଲେ ବନବାସ ବରଣ
ସତ୍ଯ ପାଇଁ ହିଁ ସକ୍ରେଟିସ୍ ଦିନେ କରିଥିଲେ ବିଷପାନ ।
ସତ୍ଯାଶ୍ରିତ ସତ୍ଯାଗ୍ରହୀ ଜୀବନେ ଭୋଗଇ ନାନାଦି କଷଣ
ସତ୍ଯ ରକ୍ଷା ଲାଗି ଅକାତରେ ଦେଇଦିଏ ଆପଣାର ପ୍ରାଣ।
ସତ୍ଯ ଇତିହାସର ଅଥଳଗର୍ଭରୁ ଦିନେ ହୁଅଇ ଉଦ୍ଘାଟିତ
ସତ୍ଯର ଶୁଭ୍ର ଆଲୋକରେ ଦୁନିଆ ହୁଅଇ ଉଦ୍ଭାସିତ।