ସ୍ନାନ ମଣ୍ଡପରେ ଚତୁର୍ଦ୍ଧାମୂର୍ତ୍ତ

ଦେଖ ଗୋ ସଜନୀ ହୋଇଛନ୍ତି ଉଭା

ସ୍ନାନ ମଣ୍ଡପରେ ଚତୁର୍ଦ୍ଧାମୂର୍ତ୍ତି

ଚର୍ମଚକ୍ଷୁ ଆଜି ହୋଇଲା ପବିତ୍ର

ଦରଶନ କରି ଜଗତପତି ।

ସୁନା କୂପୁ ଶହେ ଆଠ ଗରା ଜଳ

ଆଣି ଗରାବଡୁ ସେବକମାନେ 

ଘଟୁଆରୀ ଘୋରା ଚନ୍ଦନ ସହିତ

ଜାଇଫଳ କର୍ପୂରାଦି ମିଶ୍ରଣେ ।

ନୀତିକାନ୍ତି ସାରି ସିନାନ କରାଇ

ଭାଇ ଭଗ୍ନୀ ସଙ୍ଗେ କାଳିଆ ସୁନା

ଗଜାନନ ବେଶେ ସଜାଇଅଛନ୍ତି

ଆହା ! କି ସୁନ୍ଦର ଦିଶନ୍ତି ଅନା !

କାଞ୍ଚିର ପଣ୍ଡିତ ଗଣପତି ଭଟ୍ଟ

ଧନ୍ଯ ତାହାଙ୍କର ଭାବ ଭକତି 

ମନସ୍କାମ ପୂର୍ଣ୍ଣ କରି ମହାପ୍ରଭୁ

ସକଳେ ରୂପ ଦର୍ଶନ ଦିଅନ୍ତି ।

ପାପ ତାପ ଆଜି ସତେ କି ସମାପ୍ତ

କରିଦେବେ ମୋ ଭାବବିନୋଦିଆ

ମହିମାମଣ୍ଡିତ କମଳାର କାନ୍ତ

ଜଗନ୍ନାଥେ ଯେଣୁ ଭାବରସିଆ ।

ରଙ୍ଗା ଚରଣରେ ଏତିକି ବିନତି

ହରି ନିଅନ୍ତୁ ସରବ ବିପତ୍ତି

ତରିଯାନ୍ତୁ ଭକ୍ତେ ନାମ ଧରି ମୁଖେ

କାଳବକ୍ଷେ ରହିଥାଉ ସୁଖ୍ୟାତି ।