ସମୟ

ଘୁରି ଯାଏ ଯେବେ ସମୟର ଚକ ରେ

କହିଦିଏ ଏହି କଥା

ଆପଣାର ସାଥେ ଯଦି କେହି ନାହିଁ

ଚାଲିବାକୁ ହେବ ଏକା ।

ଲୁହ ପୋଛିପକା ଆଖିରୁ ତୋହର

ଜିତିବୁ ତୁହି ସମୟ

ଏକା ଲଢ଼ିବାକୁ ହେବ ଦୁନିଆରେ

ପାଇବୁ ନିଶ୍ଚେ ବିଜୟ ।

ଉପହାସ ଯିଏ କରୁଥିଲା ତୋର

କାଲିକି ସାବାସ୍ ଦେବ

ସମୟ ଛୁଆଁରେ ସବୁ ଯେ ବଦଳେ

ମରୁ ରେ ଝରେ ଶ୍ରାବଣ ।

ଚିରସ୍ତାହି ନୁହେଁ କିଛି ଦୁନିଆରେ

ଦୁନିଆ ଘଡିକେ ଆନ

ଦୁଃଖରେ ଲୁହରେ ଭରିଛି ହସରେ

ହସ ଲୁହ ଭରା ପ୍ରାଣ ।

ସରିଯାଏ ସିନା ଯନ୍ତ୍ରଣା ର ଦିନ

ଚିହ୍ନ ସବୁ ରହିଥାଏ

ଅନ୍ତର ଆତ୍ମା କୁ ଜଳାଏ ନୀତି ସେ

ନୀରବେ ଲୁହ ଝରାଏ ।

ଦୁନିଆକୁ ତୁମେ ଜିତିଯିବ ସତେ

ସାହସ ମନରେ ଥିଲେ

ଅନ୍ଧାରେ ତ ଛାଇ ନିଜର ନୁହଁ ଯେ

ଚାଲିଯାଏ ଦୁରେ ଦୁରେ ।

ଖରା ଛାଇ ପରା ଏଇ ଜୀବନଟା

ନିମିଶକେ ହୁଏ ଆନ

ଆଜି ଅଛି କାଲିକି ନଥିବ

କରିବାନି ଅଭିମାନ ।