ସ୍ମୃତିରେ
ସ୍ମୃତିରେ
ମନ ଗହନରେ କବିତାରେ ଲେଖା
ମଧୁଭରା ତୁମ ସ୍ମୃତି
ଭୁଲି ପାରୁନାହିଁ ତୁମକୁ ଗୋ ପ୍ରିୟା
ଭୁଲିନାହିଁ ତୁମ ପ୍ରୀତି |
ନୀରବ ରାତିରେ ତୁମେ ମନେପଡ଼
ବିଦଗ୍ଧ ମୋ ପ୍ରାଣ ଝୁରେ
ବିରହର ଜ୍ୱାଳା ବଢ଼ି ବଢ଼ି ଯାଏ
ନୟନରୁ ନୀର ଝରେ |
କେମିତି କହିବି ସ୍ମୃତିର ବେଦନା
ଯାହା ବି ଗୋପନ ଅଛି
କିଏ ବା କାହିଁକି ଶୁଣିବାକୁ ଯିବ
ଭଗ୍ନ ହୃଦୟର ପ୍ରୀତି |
ହୃଦୟେ କେବଳ ସାଇତା ସେ ସବୁ
ଜାଳିବାକୁ ମୋତେ ସାଥି
ଏକାକୀ ଜୀବନେ ବଞ୍ଚିଛି ବିରସେ
ଯାହା ମୂଲ୍ୟ ନାହିଁ କିଛି |
ସବୁ କଥା ସିନା ଅତୀତ ହୋଇଛି
କେବଳ ବଞ୍ଚିଛି ସ୍ମୃତି
ତୁମ ଅଭିମାନ ରାଗ ରୁଷା ଯେତେ
ଏବେ ବି ମୋ ମନେ ଅଛି |
ଭଲ ପାଇଥିଲ ପ୍ରଥମ କୈଶୋରେ
ଢାଳିଦେଇଥିଲ ସ୍ନେହ
ଆଜି ସେଇ ସ୍ମୃତି ମନେ ପଡି ପ୍ରିୟା
ହୃଦୟେ ଭରୁଛି କୋହ |
ଦେଖା ହୋଇନାହିଁ ଅନେକ ଦିନରୁ
ଦେଖିବାକୁ ଥରେ ଇଛା
ତୁମେ ହସିଦେଲେ ସରି ଯାଆନ୍ତା ମୋ
ହୃଦୟର ସବୁ ବ୍ୟଥା |