ସ୍ମୃତିରେ ସ୍ମୃତିରେ
ସ୍ମୃତିରେ ସ୍ମୃତିରେ
ସ୍ମୃତି ଏକ ରୂପା ଜହ୍ନ ମନ ଆକାଶରେ
ଚକ୍ଷୁ ନିମିଳିତ ହେଲେ ଉଇଁ ଆସେ ଧୀରେ ।
ଭାସି ଉଠେ ଛବି ହୋଇ ଶୈଶବ,କୈଶୋର
ଥିଲା ଯେଉଁ ଦିନ ସବୁ ଅତି ସୁଖକର ।
ବୋଉ କୋଳେ ମୁଣ୍ଡ ଗୁଞ୍ଜି ଶୋଇବାର ବେଳ
ଗପ ଶୁଣା ମନେ ପଡି ନୟନ ସଜଳ ।
ବାପାଙ୍କର ସ୍ନେହବୋଳା ‘ସୁନା ଝିଅ’ ଡାକ
ଭାତଗୁଣ୍ଡା ଖୁଆଇବା ମନେ ଭରେ ଭୋକ ।
ସ୍କୁଲ୍ ର ପ୍ରଥମ ଦିନ ଯେତେ କନ୍ଦାକଟା
ନୂଆ ସିଲଟ , ଖଡିକୁ ନୂଆ ବହି ଖାତା ।
ବର୍ଷା ରେ ଭିଜି କାଗଜଡଙ୍ଗା ଭସାଇବା
ଲୁଚି ଛପି କାହା ବାଡିରୁ ପିଜୁଳି ତୋଳିବା ।
ସାଙ୍ଗସାଥୀ ମେଳେ ଲୁଡୁ ବୋହୁଚୋରି ଖେଳ
ଜହ୍ନିଓଷା, ରଜଦୋଳି, ଭାଲୁକୁଣି, ଦୋଳ ।
କୁଆଁର ପୁନେଇଁ ପୂଜା କୁଆଁରୀଙ୍କ ମେଳେ
ମନେ ପଡିଗଲେ ଆଖି ଭରେ ଅଶ୍ରୁଜଳେ ।
ମାମୁଁଘର ଦୋଳ ଯାତ, ପୋରୁହାଁ ଅଷ୍ଟମୀ
ଦୀପାବଳି ବାଣଫୁଟା ଯେତେ ଫାଜିଲାମୀ ।
ଭାଇ ଭଉଣୀଙ୍କ ସହ ଯେତେ ରୁଷାରୁଷି
ପିଠା କଳି ମିମାଂସା ଯେ କରେ ବୋଉ ଆସି ।
ଆହା କି ସୁନ୍ଦର ଥିଲା ସେଇ ସବୁ ଦିନ
ବିସ୍ମୃତି ଗର୍ଭରେ ସେ’ତ ହୋଇଛି ବିଲୀନ ।
ବୟସର ଅପରାହ୍ନେ ବସି ଆଜି ଭାବେ
ଫେରି ଆସନ୍ତା କି ସେଇ ଦିନ ସବୁ ଏବେ ।