ସ୍ମୃତି ଜାଗି ଉଠେ ଆଜି

ସ୍ମୃତି ଭରିଅଛି ଏଇ ଜୀବନରେ,

ସୁଖଭରା, ଦୁଃଖଭରା ।

ସେହି ସ୍ମୃତି ଯେବେ ହୁଏ ଉଜ୍ଜୀବିତ,

ଦିନରେ ଦେଖାଏ ତାରା ।।

ଏମିତି ଜୀବନ କିଏସେ ଜିଇନି,

ସ୍ମୃତି ରହିନାହିଁ ଯହିଁ ।

ବେଳେବେଳେ ଆମେ ହୋଇଉଠୁ ବ୍ୟଗ୍ର,

ସ୍ମୃତିକୁ ଫେରିବା ପାଇଁ ।।

ଅତୀତର ସ୍ମୃତି ମନରେ ଉଇଁଲେ,

ଦେଖାଦିଏ ଅତୀତଟା ।

ସବୁକିଛି ପୁଣି ଲାଗେ ନୂଆ ନୂଆ,

ଲାଗି ଅତୀତର ଛିଟା ।।

ଆମ ସଭିଙ୍କର କିଛି ନା କିଛି ତ,

ଥାଏ ଅତୀତର ସ୍ମୃତି ।

ସେହି ସ୍ମୃତି ପୁଣି ଆଙ୍କି ଦେଇଯାଏ,

ପୁରୁଣା ଦିନର ପ୍ରୀତି ।।

ଅତୀତକୁ ନେଇ କେହି ତ ବଞ୍ଚେନା,

ବର୍ତ୍ତମାନ ଥାଏ ସାଥୀ ।

ବର୍ତ୍ତମାନ ପାଇଁ ସଭିଏଁ ଖୋଜନ୍ତି,

ଅତୀତର ସେହି ସ୍ମୃତି ।।

ସଭିଏଁ ଚାହାଁନ୍ତି ବର୍ତ୍ତମାନ ସହ,

ସ୍ମୃତିରେ ଯିବାକୁ ହଜି ।

ସେଥିପାଇଁ ପରା ଏ ମନ କହଇ,

ସ୍ମୃତି ଜାଗିଉଠେ ଆଜି ।।