ସଖୀ ତୁମେ ଆଶାର ଆକାଶ

ନୀଳ ଆକାଶରେ ଭାସି ବୁଲୁଥିବା

ତୁମେ ଏକ ନୀଳ ଜହ୍ନ

ମୁଁ ଏକ ଦରଦୀ ପ୍ରୀତିଭରା ଗୀତ

ତୁମକୁ ଦେଇଛି ମନ I

ଅଥଳ ସାଗର ନୀଳ ଜଳରାଶି

ପୋତଟିଏ ତୁମେ ସଖୀ

ଦିଗହରା ଏକ ନାବିକ ଦୁଃଖ ମୁଁ

କୂଳ ଖୋଜୁଥିବା ଆଖି I

ମୋ ହୃଦ ପଞ୍ଜୁରୀ ଭିତରେ ଗୋ ସଖୀ

ତୁମେ କଥାକୁହା ଶାରୀ

ବୁଝି ମୁଁ ପାରେନି ତୁମ ଉପସ୍ଥିତି

ମିଛେ ହେଉଥାଏ ଝୁରି I

ପ୍ରେମମୟୀ ତୁମେ ସାଗର କୂଳରେ

ଅଧାଗଢା ବାଲିଘର

ମୁଁ ଶୂନ୍ୟଗର୍ଭା ଶାମୁକାର ଦୁଃଖ 

ଲୁହଭରା ଆଖି ତାର I

ତୁମେ ସଖୀ ମୋର ଆଶାର ଆକାଶ

ମରୁଝର ମରୁଦ୍ୟାନ

ମୁଁ ଏକ ତୃଷିତ ଦରଜଳା ପ୍ରାଣ 

ଦରଦରେ ଭରା ମନ I

ଅଭାବି ମନର ଦୁଃଖଟେ ମୁଁ ସଖୀ

ତୁମେ ବଡଦାଣ୍ଡ ଧୂଳି

ତୁମ ପରଶରେ ପରିପୂର୍ଣ୍ଣ ହେବି

ଭରିଯିବ ମୋର ଝୁଲି I