ଶେଷ ଫଗୁଣର ଚିଠି

ଶେଷ ଫଗୁଣର ଚିଠି ଅପେକ୍ଷାରେ

ଦିନ ରାତି ଯାଏ ବିତି,

ମାସ ପରେ ମାସ ବିତିଗଲା ପରେ

ମନରେ ଆସେ ମୋ'ଭୀତି ।

ତମ କଥା ସିନା ଭାଳେ ଏକା ଏକା

ତମେ ତ ଯାଇଛ ରୁଷି,

ପ୍ରତୀକ୍ଷାର ଅନ୍ତ କରିବ ବସନ୍ତ

ଅପେକ୍ଷା ତମର ଚିଠି ।

ତମ ଚିଠି ପାଇଁ ନିତିନିତି ପ୍ରିୟା

ଧାଏଁ ଡାକଘର ଯାଏଁ,

ଅଲକ୍ଷ୍ୟରେ ମୋର ସମୟ ସରେ

ଆକାଶରେ ତାରା ଉଏଁ ।

ସନ୍ଧ୍ୟା ଦୀପ ଜାଳି ଦିଏ ହୁଳହୁଳି

ଅଗଣାରେ କୁଳବଧୂ

ଢାଇଁଢାଇଁ ଘଣ୍ଟ ଶୁଭେ ମନ୍ଦିରରେ

ତମ କଥା ଭାବୁ ଭାବୁ ।

ଘନ ଅନ୍ଧାରରେ ବୁକୁ ଚିରି ଯାଏ

ନିଃଶବ୍ଦ ହୁଏ ସହର,

ଗାଆଁ ମୁଣ୍ଡର ଦଦରା ଚାଳରେ

ଆଶ୍ରିତ ମୁଁ ଯାଯାବର ।

ନୀରବେ ଜାଳିଛି ଡିବିରି ଆଲୋକ

ଶବ ମୋ' ପଡିବ ଉଠି,

ଆଶା ଭରସାର ପ୍ରୀତି ସମ୍ଭାବନା

ଶେଷ ଫଗୁଣର ଚିଠି ।

ସେଇ ଚିଠି ପଢି ନିଘୋଡ଼ ନିଦରେ

ଶୋଇଯିବି ପ୍ରାଣପ୍ରିୟା,

ଶେଷ ଫଗୁଣର ଚିଠି ହିଁ ଭରସା

ଉତଜୀବିତ କରେ ହିଆ ।